15 Junie 2011: Glasdeurplakkers

Marlize Lotz staan op stoep Mense is geneig om hulself te misgis met glasdeure wat lyk asof hulle oopstaan, maar eintlik toe is. Nie net is dit vernederend nie, maar jy kan baie seerkry as jy daarin vasloop. Maak dus seker dat jou glasdeure duidelik sigbaar is wanneer dit toe is, deur plakkers daarop te plak.

Die plakkers wat in winkels beskikbaar is, is redelik beperk en nie almal se styl nie, so vandag wys handwerk-ghoeroe Marlize ons hoe maklik dit is om jou eie te maak.

Jy benodig:
'n ontwerp wat 'n mooi silhouette sal maak
rol deursigtige plakplastiek, wat lyk soos glas wat sandgespuit is
potlood
uitveër
skêr
maskeerband

Rol die plastiekvel op 'n gelyke oppervlak oop met die rugkant na bo. Gebruik 'n potlood om die buitelyne van jou ontwerp op die rugkant van die plastiek af te trek en sny dit uit. Trek nou die rugkant versigtig van die plastiek af en plak dit op die glasdeur.

Maak seker dat die glas goed skoon is. Jy kan dit met 'n lappie en 'n bietjie spiritus of asyn afvee om seker te maak dat daar geen vetterigheid en vuilheid meer op die glas is nie. Vryf die plakkers goed plat en maak veral seker dat die randte goed vassit sodat dit nie later oplig nie.
Ontwerp met mooi silouette
Trek patroon af
Glasdeurplakkers
   

Lees Ook: