1 Februarie 2012: Letterkuns

letterkuns

Gebruik letters en woorde om jou mure mee te versier. Jy kan dit direk op die muur verf of vasplak, maar vir 'n minder permanente effek kan jy op dieselfde manier iets op 'n skilderdoek skep. Jy het 'n skilderdoek nodig en letters of woorde wat jy van die rekenaar af kan uitdruk. Stukkies koerantpapier wat die agtergrond van die kunswerk gaan vorm, houtgom en 'n kwas, spuitverf en spuitgom en 'n skêr.

Begin deur die agterkant van die stukkies koerantpapier met houtgom te verf en plak dit oral op die skilderdoek totdat dit heeltemal bedek is. Onthou om net swart-en-wit koerantpapier te gebruik vir 'n lekker moderne gevoel. Knip nou jou letters uit en rangskik tot op die skilderdoek soos jy wil. Spuit nou die rugkante van die letters met spuitgom. Laat dit vir 'n rukkie lê totdat dit taai is (en nie meer nat nie), want jy wil dit net tydelik op jou skilderdoek plak.

Plaas die letters nou weer terug in hulle posisies op die skilderdoek en spuit die hele skilderdoek met spuitverf in die kleur van jou keuse. Laat dit om droog te word. Wanneer droog, trek die letters versigtig af en siedaar – jou eie, kontemporêre kunswerk. 

koerantpapier
plak koerantpapier
 
   

Lees Ook: